琴晚《男親女愛》(重播)講客家牌，咁啱得咁喬，mylki早兩日先諗起呢樣傳統玩意。片中啲牌係黑色，而記憶中係啲牌係好靚靚嘅橙色㗎！
屋企人叫玩呢款牌做「遊虎」(口耳相傳，不知正字)，以前成日有婆婆喺樓下玩，但時移世易，——而家好多婆婆被唔同後生住，通常去晒養老院，要見到成班婆婆圍埋坐都好難，如果見到，都係一人一手機，㩒得仲快過我(笑)，——一班婆婆响公園遊虎?此情不再嚕。
最後仙姐(苑瓊丹)玩嗰款牛仔，mylki有95%肯定佢借屍還魂咗，披住西洋啤牌嘅羊頭，賣新型啤牌玩法—「鬥牛」嘅狗肉。呢款新興玩意大約喺5-7年前响家族間躍然出世，相信係由一班原遊虎飯改良，而家每逢過年過節、喜慶飲宴都成為親戚間聯誼嘅手段(笑)。
Try translating this essay into English like the information board in Kumamoto Castle:-
“Haak-Gaa card game, a Chinese tradition card game, which is rarely-seen now, was shown on a reboardcasted TV serial. So memorable!”
熊本城嘅解說版真係可以日文五百字，中英韓統統都係一句就搞掂！比起覺得唔掂，mylki反而覺得幾搞笑，可能平日見日本人認真慣，偶然偷懶一下更令人會心微笑啩?
mylki好希望香港可以學習日本嘅態度，先嚴謹做事，嚴謹過後依然有錯漏相信大多數人都能夠寬容對待，亦希望一啲陋習繁多嘅地方對香港嘅影響少一啲，喺大環境嘅氣氛低下，可以貫徹自己，做到眾人皆醉我獨醒，吟吓詩就話易，真係要身體力行做到就唔係一件易事喇。
去完日本之後mylki好多時見到小小嘢都會聯想起日本，雖然去完韓國都會好易聯想起，但韓國嘅感覺好似係教會裡面嘅靚仔哥哥(韓式比喻XD)，令人崇拜得嚟又不失親近，而日本就好似仰慕已久嘅女神，即使近在眼前都總覺得充滿神秘感，兼夾遙不可及。
mylki有好一段時間無响blog寫三及第文，間中寫一下，當做為文化流傳作些許微薄嘅貢獻啦(笑)
No comments:
Post a Comment